GWP - შპს „ჯორჯიან უოთერ ენდ ფაუერი“, საიდენტიფიკაციო ნომერი 203826002; „მხარეები“ - „კომპანია“ და „GWP“ ერთობლივად; „მხარე“ - „კომპანია“ და „GWP“ ცალ- ცალკე; „საშემსრულებლო დოკუმენტები“ - ნებისმიერი დოკუმენტი ან/დოკუმენტები, რომელიც მოთხოვნილია...

1. ტერმინთა განმარტება

   1. GWP - შპს „ჯორჯიან უოთერ ენდ ფაუერი“, საიდენტიფიკაციო ნომერი 203826002;

   2. „კომპანია“ – „ხელშეკრულებაში“ ან ხელშეკრულების ძირითად პირობებში მოცემული პირი;

   3. „მხარეები“ - „კომპანია“ და „GWP“ ერთობლივად;

   4. „მხარე“ - „კომპანია“ და „GWP“ ცალ-ცალკე;

   5. „ხელშეკრულების ძირითადი პირობები“ – „მხარეთა“ შორის წერილობით გაფორმებული ხელშეკრულება, რომელშიც განსაზღვრულია ხელშეკრულების საგანი, ნასყიდობის ფასი, მიწოდების ვადა, საგარატიო პერიოდი და ნებისმიერი სხვა პირობა, რომელიც შესაძლოა აზუსტებდეს ავსებდეს ან ცვლიდეს წინამდებარე „ხელშეკრულების ზოგადი პირობების“ დებულებას.

   6. „ხელშეკრულების ზოგადი პირობები“ – წინამდებარე ხელშეკრულების ზოგადი პირობები;

   7. „ხელშეკრულება“ – „მხარეთა“ შორის „ხელშეკრულების“ საგანთან დაკავშირებით წერილობითი ფორმით (მათ შორის ინვოისის საფუძველზე) დადებული ნებისმიერი წერილობითი შეთანხმება;

   8. „საქონელი“ – „ხელშეკრულებით“ ან „ხელშეკრულების ძირითად პირობებში“ მოცემული საქონელი;

   9. „მომსახურება“ – „ხელშეკრულებით“ ან „ხელშეკრულების ძირითადი პირობებით“ გათვალისწინებული მომსახურება რომელიც, „კომპანიის“ მიერ მოწოდებული „საქონლის“ თანმდევი ან/და დაკავშირებული მომსახურებაა;

   10. „ნასყიდობის ფასი“ – „ხელშეკრულებით“ ან „ხელშეკრულების ძირითადი პირობებით“ გათვალისწინებული ან/და „მომსახურების“ მიწოდების სანაცვლოდ „მხარეთა“ შორის ნებისმიერი სხვა ფორმით შეთანხმებული ანაზღაურება.

   11. „საშემსრულებლო დოკუმენტები“ - ნებისმიერი დოკუმენტი ან/დოკუმენტები, რომელიც მოთხოვნილია GWP-ის მიერ „მომსახურების“ ან/და საქონლის მიწოდების დასადასტურებლად ან/და ანგარიშსწორებისთვის.

   12. „სამუშაო დღე“ - ნებისმიერი დღე ორშაბათიდან-პარასკევის ჩათვლით, გარდა საქართველოს შრომის კოდექსით გათვალისწინებული უქმე და დასვენების დღეებისა.

   13. „აკრძალული საქმიანობა“ - რუსეთის ფედერაციაში არსებული ფიზიკური ან/და იურიდიული პირისთვის საქონლის ან/და ტექნოლოგიის გაყიდვა, მიწოდება, გადაცემა ან/და ექსპორტი, ტექნიკური, საინვესტიციო, საბროკერო, ფინანსური ან სხვა სახის მომსახურების მიწოდება და სხვა სახის საქმიანობა, რომელმაც შესაძლოა პირდაპირ ან არაპირდაპირ ხელი შეუწყოს რუსეთის ფედერაციის სამხედრო ან/და ტექნოლოგიურ გაუმჯობესებას, მისი თავდაცვის ან/და უშიშროების სექტორის განვითარებას.

2. ხელშეკრულების ზოგადი პირობები

   1. „ხელშეკრულების ზოგადი პირობების დებულებებსა“ და „ხელშეკრულების ძირითადი პირობების“ დებულებებს შორის შეუსაბამობის შემთხვევაში უპირატესობა ენიჭება „ხელშეკრულების ძირითად პირობებს“.

   2. „ხელშეკრულების ზოგად პირობებში“, „ხელშეკრულების ძირითად პირობებში“ ან „ხელშეკრულების“ ნებისმიერ სხვა დანართში ან/და დამატებაში მოცემული პირობები თანაბრად ვრცელდება როგორც „საქონლის“, ასევე „მომსახურების“ მიწოდებაზე, კონტექსტის გათვალისწინებით, მიუხედავად იმისა, არის თუ არა შესაბამისი მითითება.

3. ხელშეკრულების საგანი

   1. ხელშეკრულების საგანის აღწერა მოცემულია ხელშეკრულების ძირითად პირობებში.

4. მომსახურების გაწევა/საქონლის მიწოდება

   1. იმ შემთხვევაში, თუ „ხელშეკრულების ძირითად პირობებში“ არ არის ეს განსაზღვრული სხვაგვარად, კონკრეტული „მომსახურების“/„საქონლის“ მიღების მოთხოვნას GWP „კომპანიას“ უგზავნის წერილობითი ფორმით, მათ შორის ელექტრონული ფორმით (შემდგომში „დავალება“).

   2. “კომპანია” ვალდებულია, რომ „მომსახურება“ გაწიოს/„საქონელი მიაწოდოს“ „დავალებაში“ მითითებულ ადგილას და ვადაში.

   3. იმ შემთხვევაში, თუ „მომსახურების“ გაწევის დროს აღმოჩნდება, რომ „კომპანიას“ არ შეუძლია კონკრეტული „დავალების“ შეთანხმებულ ვადაში შესრულება, მაშინ “კომპანია” ვალდებულია, რომ დაუყოვნებლივ აცნობოს GWP-ის აღნიშნულის შესახებ და შეათანხმოს „დავალების“ შესრულების ახალი ვადა.

   4. იმ შემთხვევაში, თუ „მხარეები“ ვერ შეთანხმდებიან „ხელშეკრულების“ შესრულების ახალ ვადაზე, მაშინ ეს ჩაითვლება „კომპანიის“ მხრიდან ნაკისრი ვალდებულებების დარღვევად (გარდა „ხელშეკრულებით“ გათვალისწინებული გამონაკლისი შემთხვევებისა) და GWP უფლებამოსილი იქნება შეწყვიტოს ხელშეკრულება ან/და „კომპანიის“ მიმართ განახორციელოს „ხელშეკრულებით“ მისთვის მინიჭებული ნებისმიერი და ყველა უფლებამოსილება, როგორც ამას GWP მიიჩნეს მიზანშეწონილად.

   5. „დავალება“ ჩაითვლება დასრულებულად მხოლოდ მას შემდეგ, რაც „მხარეთა“ შორის გაფორმდება ზედნადები და მიღება-ჩაბარების აქტი.

   6. „მხარეები“ ვალდებული არიან, რომ ზედნადები და მიღება-ჩაბარების აქტი გააფორმონ თითოეული „დავალებისთვის“.

5. „ნასყიდობის ფასი“ და ანგარიშსწორების პირობა

   1. გაწეული „მომსახურების“ ან/და მიწოდებული „საქონლის“ „ნასყიდობის ფასი“ შეიცავს „კომპანიის’’ ყველა ხარჯს და გადასახადს, დღგ-ს და ტრანსპორტირების ღირებულების, ასეთის არსებობის შემთხვევაში, ჩათვლით.

   2. „მხარეთა“ შორის ანგარიშსწორება წარმოებს ეროვნულ ვალუტაში, უნაღდო ანგარიშსწორების წესით, „საქონლის“ და „მომსახურების“ მიწოდებიდან და შესაბამისი მიღება-ჩაბარების აქტის გაფორმებიდან ან/და სასაქონლო ზედნადების დადასტურებიდან არაუგვიანეს 30 (ოცდაათი) კალენდარული დღისა.

6. მხარეთა ზოგადი უფლებები, ვალდებულებები და განცხადებები

   1. „კომპანია“ ვალდებულია, GWP-ს „მომსახურება“ გაუწიოს პირადად ან/და შესაბამისი ცოდნისა და კვალიფიკაციის მქონე თანამშრომლების/დაქირავებული პერსონალის საშუალებით.

   2. „კომპანია“ ვალდებულია „ხელშეკრულებით“ გათვალისწინებული „მომსახურება“ გაწიოს კეთილსინდისიერად, ჯეროვნად, სრულად, შეთანხმებულ დროსა და ადგილას, GWP ინტერესების მაქსიმალური გათვალისწინებით.

   3. „კომპანია“ ვალდებულია უზრუნველყოს, რომ „მომსახურების“ გაწევისას „მომსახურების“ გაწევაში ჩართულმა პირებმა მაქსიმალურად გამოიყენონ საკუთარი უნარ-ჩვევები, იმოქმედონ გულდასმით და დაიცვან უმაღლესი პროფესიული სტანდარტები.

   4. „კომპანია“ ვალდებულია „მომსახურების“ გაწევისას გაითვალისწინოს/შეასრულოს GWP-ს მითითებები. “კომპანია” უფლებამოსილია, გადაუხვიოს GWP-ს მითითებებს მხოლოდ მისი წინასწარი თანხმობის საფუძველზე.

   5. „კომპანია“ ვალდებულია, GWP-ს ზეპირი და/ან წერილობითი მოთხოვნის შემთხვევაში, დაუყოვნებლივ მიაწოდოს მას მოთხოვნილი დოკუმენტაცია ან/და ინფორმაცია, ცნობები წინამდებარე „ხელშეკრულების“ შესრულების მიმდინარეობის შესახებ, ხოლო „მომსახურების“ გაწევის დასრულების შემდეგ - ჩააბაროს მას ანგარიში.

   6. „კომპანია“ პასუხისმგებელია „ხელშეკრულებით“ ნაკისრი ვალდებულებების დარღვევის, „მომსახურების“ შეუსრულებლობის ან არაჯეროვანი შესრულების, ასევე მისი ბრალეული ქმედების (ან უმოქმედობის) შედეგად GWP-სათვის მიყენებულ ზიანზე (ზარალზე).

   7. GWP ვალდებულია დროულად და „ხელშეკრულებით“ დადგენილი წესის შესაბამისად გადაუხადოს „კომპანიას“ „ნასყიდობის ფასი“.

   8. GWP ვალდებულია მიაწოდოს „კომპანიას“ ყველა ინფორმაცია და დოკუმენტაცია, რომელიც სჭირდება მას „მომსახურების“ გაწევისათვის.

   9. GWP უფლებამოსილია, უარი განაცხადოს „საქონლის“ მიღებაზე, თუ „კომპანიამ“ მას მიაწოდა იმაზე ნაკლები რაოდენობის „საქონელი“, ვიდრე ეს გათვალისწინებული იყო წინამდებარე „ხელშეკრულებით“ და ცალმხრივად შეწყვიტოს წინამდებარე „ხელშეკრულება“ ან მიიღოს ასეთი „საქონელი“ და პროპორციულად შეამციროს გადასახდელი „ნასყიდობის ფასი“. გადასახდელი „ნასყიდობის ფასი“ შესამცირებელ ოდენობას განსაზღვრავს GWP, რომლის მიერ წარმოდგენილი მონაცემები, ჩაითვლება კვალიფიციურ ინფორმაციად ან/და დოკუმენტაციად და არ გახდება სადაო „კომპანიის“ მიერ;

   10. იმ შემთხვევაში, თუ „საქონლის“ რაოდენობა აღემატება წინამდებარე „ხელშეკრულებით“ გათვალისწინებულ ოდენობას, GWP უფლებამოსილია მიიღოს ეს რაოდენობა და პროპორციულად გაზარდოს გადასახდელი „ნასყიდობის ფასი“ ან მიიღოს მხოლოდ ის რაოდენობა, რაც გათვალისწინებული იყო წინამდებარე „დავალებით“ ან/და „ხელშეკრულებით“, ხოლო ზედმეტი დააბრუნოს უკან „კომპანიის“ ხარჯზე. გადასახდელი „ნასყიდობის ფასის“ გასაზრდელ ოდენობას განსაზღვრავს GWP-ს მიერ, რომლის მიერ წარმოდგენილი მონაცემები, ჩაითვლება კვალიფიციურ ინფორმაციად ან/და დოკუმენტაციად და არ გახდება სადაო „კომპანიის“ მიერ;

   11. იმ შემთხვევაში, თუ „საქონლის“ საგარანტიო ვადის განმავლობაში, ხოლო ასეთი ვადის არ არსებობისას, GWP-სათვის „საქონლის“ გადაცემიდან გონივრულ ვადაში აღმოაჩნდება ნივთობრივი ნაკლი, GWP უფლებამოსილია „კომპანიას“ ზეპირად ან წერილობით მოსთხოვოს, ხოლო „კომპანია“ ვალდებულია, GWP-ს მიერ განსაზღვრულ ვადაში საკუთარი ხარჯით უზრუნველყოს: ა) ნივთობრივი ნაკლის გამოსწორება, ხოლო თუ საქმე ეხება გვაროვნულ ნივთს, შეცვალოს ნივთი, ბ) „ნასყიდობის ფასის“ შემცირება იმ ოდენობით, რაც საჭიროა ნაკლის გამოსასწორებლად (ნაკლის გამოსასწორებლად საჭირო თანხის ოდენობა განისაზღვრება GWP-ს მიერ) ან/და გ) აუნაზღაუროს GWP-ს ნაკლის გამოსწორებაზე გაწეული დანახარჯები და მიყენებული ზიანი (ზარალი).

   12. იმ შემთხვევაში თუ „კომპანია“ დაარღვევს წინამდებარე „ხელშეკრულებით“ გათვალისწინებულ მის რომელიმე ვალდებულებას, GWP უფლებამოსილია ცალმხრივად, საკუთარი შეხედულებისამებრ, შეამციროს „კომპანიისთვის“ გადასახდელი „ნასყიდობის ფასის“ ოდენობა დარღვევის/მიყენებული ზიანის პროპორციულად. გადასახდელი „ნასყიდობის ფასის“ შესამცირებელ ოდენობას განსაზღვრავს GWP, რომლის მიერ წარმოდგენილი მონაცემები, ჩაითვლება კვალიფიციურ ინფორმაციად ან/და დოკუმენტაციად და არ გახდება სადაო „კომპანიის“ მიერ.

   13. „კომპანია“ GWP-ს სასარგებლოდ ადასტურებს და გარანტიას იძლევა, რომ არც თავად და არც მისი შვილობილი ან/და დაკავშირებული პირები, აქციონერები/პარტნიორები/მესაკუთრეები, ხელმძღვანელობითი ან/და წარმომადგენლობითი უფლებამოსილების მქონე პირები:

ა) არ არიან და არც წარსულში მოხვედრილან უფლებამოსილი ორგანოების მიერ სანქცირებულ პირთა სიაში;

ბ) წინამდებარე „ხელშეკრულების“ გაფორმებამდე არ ახორციელებდნენ „აკრძალულ საქმიანობას“ და არ განახორციელებენ „აკრძალულ საქმიანობას“ წინამდებარე „ხელშეკრულების“ მოქმედების ვადის განმავლობაში.

14. „კომპანია“ ვალდებულია დაიცვას „ხელშეკრულების“ დანართით (ეთიკის და ქცევის კოდექსი, ანტიკორუფციული პოლიტიკა, გაეროს გლობალური შეთანხმება) გათვალისწინებული განცხადებები, გარანტიები და ნაკისრი ვალდებულებები.

15. „კომპანია“ ვალდებულია GWP-ს ობიექტზე დაიცვას შრომის უსაფრთხოების, უსაფრთხოების და ჰიგიენის/სანიტარული წესები, არ დაანაგვიანოს GWP-ს ობიექტი, ასევე დაემორჩილოს GWP-ს ან/და GWP-ს წარმომადგენლების მითითებებს შრომის უსაფრთხოების, უსაფრთხოების და ჰიგიენის წესებთან დაკავშირებით.

16. „კომპანია“ ვალდებულია „მომსახურება“ გაწიოს საქართველოს კანონმდებლობით დადგენილი შრომის უსაფრთხოების შესახებ ორგანული კანონის მოთხოვნების შესაბამისად, წარმოდგენილი ჰყავდეს შრომის უსაფრთხოებაზე პასუხისმგებელი პირი, აწარმოოს რისკების შეფასება 2020 წლის 30 იანვრის ბრძანება №01-15/ნ ტექნიკური რეგლამენტის შესაბამისად და უზრუნველყოს განსაზღვრული პრევენციული ზომების გატარება.

17. „კომპანია“ თავად არის პასუხისმგებელი თავისი დაქირავებული პირების მიერ შრომის უსაფრთხოების მოთხოვნების შესრულებაზე. იმ შემთხვევაში თუ „კომპანიის“, მისი დაქირავებული პირების, თანამშრომლების ან ქვეკონტრაქტორების მიერ შრომის უსაფრთხოების წესების დარღვევა გამოიწვევს GWP-ს დაჯარიმებას ან სხვაგვარი სახდელის ან/და პასუხისმგებლობის დაკისრებას „კომპანია“ ვალდებულია აუნაზღაუროს GWP-ს მიყენებული ზიანი.

18. „კომპანია“ ვალდებულია „მომსახურების“ გაწევის დაწყებამდე GWP-ს, GWP-გან შესაბამისი მოთხოვნის მიღებისთანავე, წარუდგინოს ჩასატარებელი სამუშაოების შრომის უსაფრთხოების გეგმა, რომელიც უნდა მოიცავდეს შემდეგ ინფორმაციას:

(ა) ძირითადი სამუშაოების მოკლე აღწერილობა და ჩამონათვალი;

(ბ) საჭირო პერსონალისა და ტექნიკის ჩამონათვალი;

(გ) პერსონალისთვის ტრენინგების/ინსტრუქტაჟების ჩატარების წესი და პერიოდულობა;

(დ) იმ შემთხვევაში თუ გასაწევი მომსახურება მოიცავს ავტოტექნიკის გამოყენებას, ავტოტექნიკის საწვავით გამართვის წესი და საჭიროების შემთხვევაში შემარბილებელი ღონისძიებების ჩამონათვალი;

(ე) შესასრულებელი სამუშაოების წინასწარი რისკების შეფასება;

(ვ) „მომსახურების“ გაწევაში ჩართული პირების კვალიფიკაციის დამადასტურებელი დოკუმენტაცია (სერტიფიკატები, შესაბამისი ტრენინგის გავლისა და სხვა კვალიფიკაციის დამადასტურებელი მასალა).

19. „კომპანია“ ვალდებულია „მომსახურების“ გაწევის პროცესში დაიცვას საქართველოში მოქმედი გარემოს დაცვასთან დაკავშირებული კანონმდებლობა.

20. „კომპანია“ აცხადებს, გარანტიას იძლევა და კისრულობს ვალდებულებას, რომ წინამდებარე ხელშეკრულების ვადის ამოწურვამდე ან/და ვალდებულებების სრულად შესრულებამდე (რომელი გარემოებაც უფრო გვიან დადგება):

(ა) არ მოხდება მისი მოვალეთა რეესტრში რეგისტრაცია ან არ იარსებებს მისი მოვალეთა რეესტრში რეგისტრაციის საფუძველი;

(ბ) მასზე არ გავრცელდება საგადასახადო გირავნობა/იპოთეკა და არ იარსებებს მასზე ასეთი შეზღუდვის გავრცელების საფუძველი;

(გ) მასზე არ გავრცელდება ყადაღა, აკრძალვა ან/და სხვა სახის საჯარო-სამართლებრივი შეზღუდვა;

(დ) მის მიმართ არ დაიწყება ან/და არ იარსებებს გადახდისუუნარობის დაწყების საფუძველი;

(ე) მის მიმართ არ იარსებებს სხვაგვარი გარემოება, რომელიც საფრთხეს შეუქმნის „კომპანიის“ მიერ ვალდებულებების შესრულებას.

21. „მხარეები“ თანხმდებიან, რომ იმ შემთხვევაში თუ „კომპანიის“ ფინანსური მდგომარეობა არსებითად გაუარესდება ან არსებობს მისი ფინანსური მდგომარეობის არსებითად გაუარესების რისკი, GWP უფლებამოსილია მისთვის ყოველგვარი პასუხისმგებლობის დაკისრების ან ზიანის ანაზღაურების ვალდებულების წარმოშობის დაკისრების გარეშე შეწყვიტოს წინამდებარე ხელშეკრულება. ასეთ შემთხვევაში ხელშეკრულება შეწყვეტილად ჩაითვლება შეწყვეტის შესახებ შეტყობინების მიღებიდან მომდევნო დღეს. ამ პუნქტის მიზნებისთვის „კომპანიის“ ფინანსური მდგომარეობის არსებით გაუარესებად ითვლება „კომპანიის“ მიერ 6.20 მუხლით გათვალისწინებული გარანტიების, განცხადებების და ვალდებულებების შეუსრულებლობა

7. „მომსახურების“ და „საქონლის“ ხარისხი და საგარანტიო ვადა

   1. მიწოდებული „საქონლისა“ და გაწეული „მომსახურების“ ხარისხი უნდა შეესაბამებოდეს „მომსახურების“ სფეროში დადგენილ მოთხოვნებსა და სტანდარტებს და „მხარეთა“ მიერ შეთანხმებულ ხარისხობრივ და ტექნიკურ მახასიათებლებს.

   2. იმ შემთხვევაში, თუ საგარანტიო ვადის განმავლობაში „მომსახურებას“ ან/და საქონელს აღმოაჩნდება რაიმე ხარვეზი, „კომპანია“ ვალდებულია GWP-სგან შესაბამისი შეტყობინების მიღებიდან გონივრულ ვადაში გამოასწოროს ყველა ასეთი ხარვეზი, ხოლო თუ ასეთი ხარვეზის გამოსწორება შეუძლებელია ან საჭიროებს არაგონივრულად დიდ დროს, მაშინ შეცვალოს „საქონელი“ ახალი, უხარვეზო „საქონელით“ ან/და გამოასწოროს „მომსახურების“ ნაკლი. „კომპანია“ ვალდებულია გაიღოს ასეთ შეკეთებასთან ან/და შეცვლასთან ან/და ნაკლის გამოსწორებასთან დაკავშირებული ყველა თანმდევი ხარჯი.

   3. იმ შემთხვევაში, თუ „კომპანია“ დააყოვნებს „მომსახურების“ ან/და „საქონლის“ შეკეთებას/გამოსწორებას ან/და შეცვლას, GWP უფლებამოსილია თვითონ უზრუნველყოს ხარვეზის გამოსწორება, ხოლო აღნიშნულთან დაკავშირებული ხარჯების, ასევე შეკეთების დაყოვნებით მიყენებული ზიანის (ზარალის), ასეთის არსებობის შემთხვევაში, ანაზღაურება მოსთხოვოს „კომპანიას“ ან/და დაქვითოს მისთვის გადასახდელი ნებისმიერი სხვა მიმდინარე თუ მომავალში წარმოშობილი გადასახდელებიდან.

8. მხარეთა პასუხისმგებლობა

   1. „ხელშეკრულებით“ გათვალისწინებული ვალდებულებების შეუსრულებლობის ან არასათანადო შესრულების შემთხვევაში, „მხარეები“ პასუხს აგებენ „ხელშეკრულებით“ და საქართველოს კანონმდებლობით დადგენილი წესით.

   2. „ხელშეკრულებით“ ნაკისრი ვალდებულებების შეუსრულებლობის ან არაჯეროვნად შესრულების შემთხვევაში, მათ შორის შესრულების ვადის გადაცილებისათვის „GWP“ უფლებამოსილია დააკისროს „კომპანიას“ პირგასამტეხლო ყოველ ვადაგადაცილებულ დღეზე „ნასყიდობის ფასის“ 0.1%-ის ოდენობით ან/და თითოეული დარღვეული ვალდებულებისთვის 100 (ასი) ლარის ოდენობით.

   3. „მხარეთა“ მიერ „ხელშეკრულების“ პირობების დარღვევის შემთხვევაში, პირგასამტეხლოს გადახდა არ ათავისუფლებს „მხარეებს“ „ხელშეკრულებით“ გათვალისწინებული ვალდებულებების შესრულებისაგან.

   4. წინამდებარე „ხელშეკრულების ზოგად პირობებზე“ ხელმოწერით „კომპანია“ აღიარებს და ეთანხმება, რომ იმ შემთხვევაში, თუ ამ „ხელშეკრულების“ მოქმედების ვადის განმავლობაში „კომპანიას“ GWP-ის მიმართ გადასახდელი ექნება რაიმე სახის პირგასამტეხლო ან/და ჯარიმა ან/და ზიანის საკომპენსაციო თანხა, GWP უფლებამოსილია ასეთი პირგასამტეხლოს ან/და ჯარიმის ან/და ზიანის საკომპენსაციო თანხა დაქვითოს ნებისმიერი მიმდინარე გადასახდელი ვალდებულებიდან, მიუხედავად იმისა, თუ რის საფუძველზე წარმოიშვა იგი.

   5. წინამდებარე „ხელშეკრულების“ დანართით (ეთიკის და ქცევის კოდექსი, ანტიკორუფციული პოლიტიკა, გაეროს გლობალური შეთანხმება) გათვალისწინებული განცხადებების, გარანტიების და ნაკისრი ვალდებულებების შეუსრულებლობის ან არაჯეროვნად შესრულების შემთხვევაში GWP უფლებამოსილია მოსთხოვოს „კომპანიას“ მიყენებული ზიანის სრულად ანაზღაურება, მათ შორის „ხელშეკრულების“ ვადამდე შეწყვეტით გამოწვეული ზიანის ანაზღაურება, იქნება ეს პირდაპირი თუ ირიბი, მატერიალური თუ არამატერიალური, ფაქტობრივი თუ მიუღებელი შემოსავალი და/ან სხვა.

9. „ხელშეკრულების“ მოქმედების ვადამდე შეწყვეტა

   1. წინამდებარე „ხელშეკრულება“ ძალაში შედის „მხარეთა“ მიერ მისი ხელმოწერის თარიღზე და ძალაშია „მხარეთა“ მიერ ნაკისრი ვალდებულებების სრულად და წარმატებით შესრულებამდე.

   2. წინამდებარე „ხელშეკრულების“ შეწყვეტა მისი მოქმედების ვადის ამოწურვამდე შესაძლებელია:

(ა) დაუყოვნებლივ, „კომპანიის“ მიერ, თუ GWP არსებითად დაარღვევს წინამდებარე „ხელშეკრულებით“ გათვალისწინებულ ვალდებულებას და მიუხედავად დარღვევის გამოსწორების თაობაზე წერილობითი მოთხოვნის (შეტყობინების) მიღებისა, ამავე მოთხოვნაში (შეტყობინებაში) მითითებულ ვადაში, არ გამოასწორებს ამგვარ დარღვევას;

(ბ) დაუყოვნებლივ, GWP-ს მიერ, თუ „კომპანია“ დაარღვევს წინამდებარე „ხელშეკრულებით“ გათვალისწინებულ მის რომელიმე ვალდებულებას ან პირობას და მიუხედავად დარღვევის გამოსწორების თაობაზე წერილობითი მოთხოვნის (შეტყობინების) მიღებისა, ამავე მოთხოვნაში (შეტყობინებაში) მითითებულ ვადაში, არ გამოასწორებს ამგვარ დარღვევას;

(გ) დაუყოვნებლივ, GWP-ს მიერ, მისთვის ყოველგვარი პასუხისმგებლობის (მათ შორის რაიმე სახის ზიანის ანაზღაურების ან პირგასამტეხლოს) დაკისრების გარეშე, თუ „კომპანია“ დაარღვევს წინამდებარე „ხელშეკრულებით“ გათვალისწინებულ კონფიდენციალურობის დაცვის ვალდებულებას ან წინამდებარე „ხელშეკრულების“ დანართით (ეთიკის და ქცევის კოდექსი, ანტიკორუფციული პოლიტიკა, გაეროს გლობალური შეთანხმება) გათვალისწინებულ განცხადებებს, გარანტიებს და ვალდებულებებს;

(დ) ნებისმიერ დროს, ყოველგვარი დასაბუთების გარეშე GWP-ს მიერ „კომპანიისათვის“ სულ მცირე 7 (შვიდი) კალენდარული დღით ადრე გაგზავნილი წერილობითი შეტყობინებით; ან

(ე) ნებისმიერ დროს, „მხარეთა“ ორმხრივი წერილობითი შეთანხმებით.

(ვ) „ხელშეკრულებით“ გათვალისწინებულ სხვა შემთხვევებში.

3. თუ „ხელშეკრულება“ „კომპანიამ“ მაშინ შეწყვიტა, როდესაც GWP მოკლებული იყო შესაძლებლობას, სხვაგვარად უზრუნველეყო თავისი ინტერესები, „კომპანიამ“ უნდა აუნაზღაუროს GWP-ს „ხელშეკრულების“ შეწყვეტით მიყენებული ზიანი, გარდა იმ შემთხვევებისა, როცა „კომპანიას“ ამისათვის მნიშვნელოვანი საფუძველი ჰქონდა და აღნიშნულის შესახებ ცნობილი იყო GWP-სათვის.

4. „მხარეები“ თანხმდებიან, რომ „ხელშეკრულების“ ნებისმიერი მიზეზით შეწყვეტის (მოშლის) შემთხვევაში, GWP „კომპანიას“ აუნაზღაურებს მხოლოდ შეწყვეტის თარიღამდე ფაქტობრივად მიღებული მომსახურების ღირებულებას (გარდა იმ შემთხვევისა, როდესაც „ხელშეკრულების“ შეწყვეტის საფუძველს წარმოადგენს „კომპანიის“ მიერ ნაკისრი ვალდებულებების შეუსრულებლობა), რაც დადასტურებული უნდა იყოს მხარეთა მიერ ხელმოწერილი მიღება-ჩაბარების აქტით. ამასთან GWP-ს მიერ „ხელშეკრულების“ მოშლის შედეგად მიყენებული ზიანი/ზარალი (იქნება ეს პირდაპირი თუ ირიბი, მატერიალური თუ არამატერიალური, ფაქტობრივი თუ მიუღებელი შემოსავალი და/ან სხვა) არ ანაზღაურდება და „კოპანია“ წინასწარ, გამოუთხოვადად და უპირობოდ უარს აცხადებს „ხელშეკრულების“ მოშლის შედეგად მიყენებული ზიანის/ზარალის (იქნება ეს პირდაპირი თუ ირიბი, მატერიალური თუ არამატერიალური, ფაქტობრივი თუ მიუღებელი შემოსავალი და/ან სხვა), ამგვარის არსებობის შემთხვევაში, ანაზღაურების მოთხოვნაზე.

5. წინამდებარე „ხელშეკრულების“ მოქმედების ვადის დასრულების ან ნებისმიერი მიზეზით შეწყვეტის შემთხვევაში „კომპანია“ ვალდებულია დაუყოვნებლივ დაუბრუნოს GWP-ს ყველა ფაილი, მასალა, დოკუმენტი, მონაცემი, ანგარიში, ჩანაწერი და/ან ნებისმიერი სხვა ქონება, რომელიც გადაცემული ქონდა „კომპანიას“ GWP-სგან ან რომელიც შეძენილი და/ან შექმნილი იქნა GWP-სათვის წინამდებარე „ხელშეკრულების“ ფარგლებში.

10. ფორს-მაჟორი

    1. „მხარეები“ თავისუფლდებიან პასუხისმგებლობისაგან „ხელშეკრულებით“ ნაკისრი ვალდებულებების შეუსრულებლობისათვის ან არადროული შესრულებისათვის, თუ აღნიშნული გამოწვეული იქნება ფორსმაჟორული ვითარებით.

    2. „ხელშეკრულების“ მიზნებისათვის ფორსმაჟორული ვითარება, შეზღუდვის გარეშე, მოიცავს: ომს, ამბოხებას, სამოქალაქო არეულობას, მიწისძვრას, ხანძარს, აფეთქებას, ქარიშხალს, წყალდიდობას ან სხვა სტიქიურ უბედურებებს, ასევე სახელმწიფო დაწესებულებების სხვა ქმედებასა და უმოქმედობას, რომელიც „მხარეთა“ გონივრული კონტროლის ფარგლებს სცილდება და რომლის დადგომაც „ხელშეკრულებით“ გათვალისწინებული ვალდებულებების შესრულებას შეუძლებელს ხდის.

    3. „მხარე“, რომელსაც ფორსმაჟორული ვითარება შეეხო, უმოკლეს ვადაში, მაგრამ ამგვარი გარემოების დადგომიდან არაუგვიანეს 5 (ხუთი) კალენდარული დღისა, ვალდებულია, შეატყობინოს მეორე „მხარეს“ ამგვარი ფორსმაჟორული ვითარების თაობაზე, ფორსმაჟორული ვითარების ხასიათის და მისი შედეგების სათანადო აღწერით.

    4. ფორსმაჟორული ვითარების დადგომის შემთხვევაში, „მხარეთა“ მიერ „ხელშეკრულებით“ ნაკისრი ვალდებულებების შესრულება გადაიწევს ამგვარი ფორსმაჟორული ვითარების დამთავრებამდე/აღმოფხვრამდე.

    5. იმ შემთხვევაში, თუ ფორსმაჟორული ვითარება გასტანს ზედიზედ 45 (ორმოცდახუთი) კალენდარულ დღეზე მეტ ხანს, თითოეულ „მხარეს“ უფლება აქვს მეორე „მხარისათვის“ გაგზავნილი წერილობითი შეტყობინების საფუძველზე, შეწყვიტოს წინამდებარე „ხელშეკრულება“ ამგვარი შეწყვეტის შედეგად პასუხისმგებლობის დაკისრების გარეშე.

11. საბანკო გარანტია

    1. იმ შემთხვევაში თუ „ხელშეკრულების“ ძირითადი პირობების თანახმად, „კომპანია“ ვალდებულია GWP-ს წარუდგინოს საბანკო გარანტია, ასეთი გარანტია უნდა იყოს უპირობო და გამოუთხოვადი, საბანკო გარანტიის შინაარსი და საბანკო გარანტიის გამცემი პირი (გარანტი) წინასწარ უნდა შეთანხმდეს GWP-სთან. თუ სხვა რამ არ არის გათვალისწინებული „ხელშეკრულების“ ძირითადი პირობებით, საბანკო გარანტიის მოქმედების ვადა არანაკლებ 30 კალენდარული დღით უნდა აღემატებოდეს „ხელშეკრულებით“ გათვალისწინებული „მომსახურების გაწევის ან/და „საქონლის“ მიწოდებისთვის (რომელი ვადაც უფრო გვიან დადგება) განსაზღვრულ ვადას. საბანკო გარანტიასთან დაკავშირებული ხარჯები უნდა გაიღოს „კომპანიამ“.

12. კონფიდენციალობა

    1. „კომპანია“ კისრულობს ვალდებულებას დაიცვას წინამდებარე „ხელშეკრულების“ შინაარსის კონფიდენციალობა და „ხელშეკრულების“ შესრულების პროცესში მიღებული ან/და მოპოვებული ინფორმაცია GWP-ის წინასწარი წერილობითი თანხმობის გარეშე არ გაუმჟღავნოს მესამე პირებს ან გახადოს ინფორმაცია საჯაროდ ხელმისაწვდომი. კონფიდენციალურად ითვლება ნებისმიერი ინფორმაცია (ზეპირი თუ წერილობითი ფორმით და ნებისმიერ საშუალებაზე არსებული), რაც უკავშირდება GWP-ის საქმიანობას, ფინანსურ და სხვა საკითხებს, და რომელიც „კომპანიისთვის“ ან „კომპანიის“ დირექტორების, თანამშრომლების, დაქირავებული პირებისა და ქვეკონტრაქტორებისთვის ცნობილი გახდება წინამდებარე „ხელშეკრულებით“ გათვალისწინებული ვალდებულებების შესრულების პროცესში და რომელიც არ არის საჯაროდ ხელმისაწვდომი საზოგადოებისთვის.

    2. წინამდებარე „ხელშეკრულების“ 12.1 მუხლში მოცემული ვალდებულება არ ვრცელდება ინფორმაციაზე:

(ა) რომელიც არის ან გახდება საჯაროდ ხელმისაწვდომი „კომპანიისაგან“ დამოუკიდებლად;

(ბ) რომელიც ხელმისაწვდომი გახდება საჯაროდ „კომპანიის“ მიერ წინამდებარე „ხელშეკრულების“ პირობების შესაბამისად;

(გ) რომელიც საჯაროდ ცნობილია წინამდებარე „ხელშეკრულების“ დაურღვევლად;

(დ) რომელსაც უკვე ფლობს მიმღები მხარე წინამდებარე „ხელშეკრულების“ თარიღისათვის;

(ვ) რომლის გამჟღავნებაც „კომპანიას“ მოეთხოვება, რომელიმე სახელმწიფო ორგანოს ან სამართალდამცავი ორგანოს მიერ კანონმდებლობის თანახმად, იმ პირობით, რომ კანონმდებლობით დაშვებულ ფარგლებში, „კომპანია“ GWP-ს დაუყოვნებლივ შეატყობინებს წინამდებარე პუნქტის თანახმად მოთხოვნილი გამჟღავნების გარემოებების შესახებ და „კომპანია“ კონფიდენციალურ ინფორმაციას გაამჟღავნებს მხოლოდ იმ მოცულობით, რაც აუცილებელია შესაბამისი მოთხოვნის ან საჭიროების დასაკმაყოფილებლად.

3. მუხლებით 12.1 და 12.2 გათვალისწინებული ვალდებულებების დარღვევის შემთხვევაში GWP უფლებამოსილია შეწყვიტოს წინამდებარე ხელშეკრულება

4. ინფორმაციის კონფიდენციალურად დაცვის ვალდებულება ძალას ინარჩუნებს „ხელშეკრულების“ შეწყვეტის შემდეგაც უვადოდ.

5. „კომპანიის“ დირექტორების, თანამშრომლების, დაქირავებული პირებისა და ქვეკონტრაქტორების მიერ  წინამდებარე მე-12 მუხლით გათვალისწინებული ვალდებულების დარღვევის შემთხვევაში GWP უფლებამოსილია „კომპანიას“ მოსთხოვოს ზიანის ანაზღაურება ხოლო „კომპანია“  ვალდებულია აუნაზღაუროს GWP-ს მიყენებული ზიანი.

13. პერსონალური მონაცემები და ინფორმაციული უსაფრთხოება

    1. „კომპანია“ თანხმობას აცხადებს მისგან GWP-ისათვის გადაცემულ პერსონალურ მონაცემთა GWP-ის მიერ  სახელშეკრულებო და კანონით გათვალისწინებული მიზნებით დამუშავებაზე, მათ შორის, მესამე პირებისათვის გადაცემაზე, „პერსონალურ მონაცემთა დაცვის შესახებ“ საქართველოს კანონისა და GWP-ის „პერსონალურ მონაცემთა დაცვის პოლიტიკის“ შესაბამისად. „ხელშეკრულებაზე“ ხელმოწერით „კომპანია“ ადასტურებს, რომ იგი გაეცნო GWP-ის „პერსონალურ მონაცემთა დაცვის პოლიტიკას“ და მისი პირობების მიმართ პრეტენზიები არ გააჩნია.

    2. იმ შემთხვევაში, თუ ხდება „კომპანიის“ მიერ GWP-ისათვის მესამე პირების პერსონალურ მონაცემთა გადაცემა, „კომპანია“ აცხადებს და იძლევა გარანტიას, რომ მას კანონის მოთხოვნათა დაცვით აქვს აღნიშნულის უფლება მოპოვებული. თუ „კომპანიის“ მიერ ამ განცხადებისა და გარანტიის დარღვევა გამოიწვევს GWP-ისათვის რაიმე პასუხისმგებლობის დაკისრებას, „კომპანია“  ვალდებულია აუნაზღაუროს GWP-ს მიყენებული ზიანი.

    3. „კომპანია“ ვალდებულია GWP-სა და მესამე პირების პერსონალური მონაცემები დაამუშავოს „პერსონალურ მონაცემთა დაცვის შესახებ“ საქართველოს კანონის სრული დაცვით.

    4. „კომპანია“ ვალდებულია დაიცვას ინფორმაციული უსაფრთხოების შესახებ საქართველოს კანონის მოთხოვნები.  ამასთან „კომპანია“ ვალდებულია „მომსახურების“ გაწევა განახორციელოს იმგვარად, რომ საფრთხე არ შეექმნას  GWP-ის  ინფორმაციულ რესურსს და დაიცვას მომსახურების სფეროში არსებული  GWP-ის  ინფორმაციული უსაფრთხოების უზრუნველყოფისთვის საჭირო შესაბამისი სტანდარტები.  „კომპანია“ ვალდებულია უზრუნველყოს თავისი ინფრასტრუქტურის, რომლის დაუცველობამ შესაძლოა გავლენა იქონიოს GWP-ზე, სათანადო დაცვა, რაც მოიცავს მათ შორის, მაგრამ არა მხოლოდ ლიცენზირებულ ანტი-ვირუსს, და ა.შ.

    5. „კომპანია“ თავად არის პასუხისმგებელი თავისი დირექტორების, თანამშრომლების, დაქირავებული პირებისა და ქვეკონტრაქტორების მიერ პერსონალურ მონაცემთა დაცვისთვის გათვალისწინებული მოთხოვნების შესრულებასა და ინფორმაციული უსაფრთხოების უზრუნველყოფისთვის აუცილებელი ღონისძიებების განხორციელებაზე. იმ შემთხვევაში თუ „კომპანიის“, მისი დირექტორების, თანამშრომლების, დაქირავებული პირების ან ქვეკონტრაქტორების მიერ აღნიშნული მოთხოვნების დარღვევა გამოიწვევს GWP-ს  დაჯარიმებას ან/და სხვაგვარი სახდელის ან/და პასუხისმგებლობის დაკისრებას „კომპანია“  ვალდებულია აუნაზღაუროს GWP-ს მიყენებული ზიანი.

14. მარეგულირებელი კანონმდებლობა და დავების გადაჭრა

    1. „ხელშეკრულება“ რეგულირდება საქართველოს კანონმდებლობით და განიმარტება მის შესაბამისად.

    2. „მხარეთა“ შორის „ხელშეკრულების“ ირგვლივ წამოჭრილი ნებისმიერი დავა უნდა გადაწყდეს მოლაპარაკების გზით. იმ შემთხვევაში, თუ „მხარეები“ ვერ შეძლებენ შეთანხმების მიღწევას, დავა განსახილველად გადაეცემა საქართველოს შესაბამისი განსჯადობის სასამართლოს.

15. დასკვნითი დებულებები

    1. „ხელშეკრულების“ ნებისმიერი ცვლილება/დამატება ძალაშია მხოლოდ „მხარეთა“ მიერ შესაბამისი წერილობითი შეთანხმებით გაფორმების შემდეგ.

    2. „ხელშეკრულების“ რომელიმე დებულების ბათილობა არ იწვევს მისი სხვა დებულებ(ებ)ის ან/და მთლიანად „ხელშეკრულების“ ბათილობას. ბათილი დებულების ნაცვლად, გამოიყენება ისეთი დებულება, რომლითაც უფრო ადვილად მიიღწევა „ხელშეკრულებით“ (მათ შორის ბათილი დებულებით) გათვალისწინებული მიზანი.

    3. „მხარეები“ ადასტურებენ, რომ მათ გაცნობიერებული აქვთ „ხელშეკრულების“ შინაარსი, იგი ზუსტად გამოხატავს „მხარეთა“ თავისუფალ ნებას და რომ მათ მიერ ნების გამოვლენა მოხდა „ხელშეკრულების“ შინაარსის გონივრული განსჯის შედეგად.

    4. წინამდებარე „ხელშეკრულებაზე“ ხელმოწერით „მხარეები“ აღიარებენ და ადასტურებენ, რომ მათ მიღებული აქვთ ყველა თანხმობა და დასტური, რომელიც შესაძლოა აუცილებელი იყოს ამ „ხელშეკრულების“ გაფორმებისთვის მათი შიდა კორპორატიული დოკუმენტებით ან/და საქართველოს მოქმედი კანონმდებლობით.

    5. წინამდებარე „ხელშეკრულების ზოგადი პირობები“ გაფორმებულია თანაბარი იურიდიული ძალის მქონე ორ ეგზემპლარად, რომელთაგან ერთი ინახება „GWP“-სთან, ხოლო მეორე - „კომპანიასთან“.

მხარეთა ხელმოწერები:

GWP________________________________________

„კომპანია“ ___________________________________